Pantun Minang Kasiah Balarangan

Barauik buluah sabilah
Buluah mudo malah kironyo
Dimulai kasiah bakisah
Larangan Urang Baduo

Tasabuik pakan Sinayan
Pakan kamih lai ado pulo
Bamulai kasiah di badan
cinto jo rindu di dalam dado

Rumah gadang rangkiang balirik
Panyimpan padi di halaman
Badan jauah jadi panyakik
Ba itu kasiah nan denai tangguangkan

Baringin di tangah rimbo
ka duo batang kapeh
Sakik sanang bialah dicubo
Asa dapek ba suntiang ameh

Iyo pulo di tangah gurun
batang sampia itu banamo
Kasiah di padu lah tigo taun
tibo di ujuang malapeh hao

Pabilo padi dituai
Kalau di sawah padi lah masak
Musabab janji ko ungkai
Rang gaek kito samo manulak

Padi masak nan ka dituai
Jarami di baka kasudahannyo
Adolah bapulang ka diri denai
hiduik susah manahan sansaro

Daun siriah tumbuah manjelo
Tumbuah di paga si rumah gadang
Bukan denai indak bausaho
Mande takuik ba minantu tapandang

Bajalan kito ka mudiak
nan tak ado ka kito cari
Di etong pulo ka diri adiak
Urang sanang dalam nagari

Lapehkan juo si ayam kuriak
nak mangakeh sampainyo sanjo
Baa pulo alasan mande adiak
takuik adiak tabao seso dek diri ambo